قمة الرومانسية بنص الظهر

الحليوة خابرت لخطيبهه :الووووو حمودي حبيبي تعال طلعني شنو عبالك انخطبت يعني ابقى بالبيت؟
حمودي:ها حبيبي... مو على بعضك احس..وين اطلعج متكليلي الدنيا تحمس حمس من الحر حتى سيارتي ذابت تايراتهه..

سوسو(الاسم الافتراضي للخطيبة):يعني متحبني مو ؟

حمودي( طركاعة اللفتج كون): حبيبتي حضري روحج اني جايلج بالطريق بس اجلجل شعري

ورة ساعتين سوسو وحمودي كاعدين على الكورنيش بعز الحر حتى تمثال السياب يريد ينتحر ويشمر روحة بالشط(بالنسبة للبصراويين هاي )

سوسو:حبيبي....دتشوف النجوم شكد حلوة (تريد تصير رومانسية الاخت )

حمودي(كبر لفج): حبيبتي اني انسمطت علباتي من الحر متكليلي يانجوم هاي بهالظهر الاحمر؟

سوسو:حبيي دتشوف هالنهر كدامنة والعصافير الطايرة وتزقزق؟

حمودي: مدا اشوف بس الكفخة مالت دخان السيارة مالت هذا ابن الـ.....!!

سوسو:شدعوة عليك حمودي عاد صير شوية رومانسي

حمودي:شتريدين اكولج وانتي كتلتي روحج على الطلعة بهالحر

سوسو:شنو انت ماتحبني لو شنو؟

حمودي:لا شلون مااحبج ياعيني

سوسو:لا جذاب انت متحبني

حمودي:ادري احرك روحي حتى تصدكين؟

سوسو (خبصت روحه بالبجي): لا حمودي انت تغيرت هواية عن قبل

حمودي:لا وروح بيبيتي احبج شعندي غيرج

سوسو:عااااااااا عيييييييييي عااااااااااااا (تبجي عبالك مولدتنة من تكعر من يخلص بنزينهه)

حمودي:بلة ليش هالبجي ها؟

سوسو: طلكني احمد طلكني

حمودي:ولج هو غير نتزوج شفتهمت اني متكليلي؟

سوسو:اها...!! ومتريد تطلكني مو؟

حمودي:اشتعل ابو هذا اليوم الي طلعت بيه وياج

سوسو:ااي اي هاي لان اني جبرتك على الطلعة

حمودي:شوفي ,ترى مالي خلك وراح اسكت حتى لاتكبر المشكلة

سوسو:شتقصد اني احب المشاكل؟

حمودي:لا لا......... اني قصدي....(الاخ ضل يمتمت ويعتعت مثل تاتا عتيكة)

سوسو:اي اي اخذني على كد عقلي

حمودي:بوية لاتزعلين وانطيني راسج ابوسه
(هاي اني لو يكلي راسج ابوسهه ,ميت جلاق اطكة شنو امك اني)

سوسو:هيجي بكل بساطة تريد تراضيني ؟

حمودي طكت روحه وجان يطفر بالشط حتى يخلص من طلايب ومشاكل سوسو

جان سوسو تباوعلة وهو يغرك بالشط وهية تكول : عبالك من سويت هيجي راح اسامحك